تنظيم وتدبير مصروف البيت

 فى المقال ده هقولك ازاي تدبري وتوفري في مصروف بيتك والنظام دة هتمشي عليه سواء انتي موظفة او لا هتعملي لبيتك مصروف شهري لأحتياجات البيت ..

طبعا انا مش هقدر أحدد رقم معين لأن انتي ومقدرتك او انتي وظروفك ومش كل بيت زي التاني سواء في الأحتياجات او فى الدخل بس انا هقول الطريقة وانتي تظبيطيها علي حسب دخلك ومرتبك أو شغلك أو مصروف بيتك ولازم يكون في نظام في الموضوع لان النظام هو أول طرق التوفير ومش معني أنك هتوفرى يبىئي هتعيشي علي حاله من التقشف هتاكلي فول وطعمية وهتمسكي علي نفسك لا الموضوع مش كدة بالعكس انتي ممكن تاكلي اللي نفسك فيه بس الموضوع بشوية نظام فقط أحنا حتي الاكل البايت مش هناكله وطبعا دي جرية شخصية في ناس مش بتحب ومش بتقدر تاكل الاكل البايت والأحسن والأفضل أن يكون الاكل طازة وفريش ..

طبعا انتي بتاخدي مرتب أي كان الرقم اللي هتقبضية أول حاجه طبعا هتطلعي ( صدقة ) ودى علشان ربنا يبارك حتي لو مبلغ بسيط جدا جدا وممكن تطلعية لأي حد محتاج او اخواتك او مامتك او اي حد من اللي حواليكي أيآ كان ..

هنقسم بئي المصاريف اللي بتحتاجيها في الشهر كمصاريف غاز - كهرباء - مواصلات - حصص لو عندك أولاد فى مدرسة مثلا أو طلبات للبيبي من بامبرز وغيره وكمان لازم تعملي مصروف كل يوم أو مبلغ يومي تعينيه علي جمب لآي ظرف لاقدر الله علشان تقدري تعملي نظام لنفسك تمشي عليه ..

أولا : هتجيبي نوت بوك او كراسه أو كشكول ايآ كان ودى أساسى وهتكون أيدك ورجلك ولازم تكون معاكي علي طول حتي لو برة البيت تكون في شنطة ايدك ودي بئي علشان تكتبي فيها كل طلبات البيت من خزين ومنظفات ولحمه وفراخ وكهربا ونت وإيجار وتليفونات وبتحطي رقم أدام كل حاجه علشان تعرفي في الاخر هتجمعي كام جنية ..

هتجيبي بئي أظرف صغيرة كدا دى علشان المصروف اليومي لكل يوم علي مدار 30 يوم في الشهر وكمان هتحطي باقي الطلبات والمستلزمات بتاعه الشهر يعني هتحتاجي أكثر من 30 ظرف هتحاولي كمان تعملي مصروف يومي مثلا ودة بيكون من 20 إلي 30 جنية يوميآ وممكن أكتر علي حسب مقدرتك ودة هتعينيه علي جمب وهتقفلي عليه ..

هتطلعي ظرف كل يوم وهتصرفي منه وتجيبي بيه حاجتك وأحتياجاتك بتاعة اليوم يعني فطار - غدا - عشا وممكن اليوم دا متجبيش غدا ويكون عندك غدا أو عندك مجمدات او أكل جاهز فى الفريزر أو حاجات من الخزين وممكن توفرى المبلغ كله أنتي وشطارتك اللي توفرية في اليوم حتي لو جنية تاخدية وتعينيه علي جنب وحوشية ماتصريفهوش في اليوم اللي بعدو ولا تضيعية ممكن تخلية علي جمب أو ترجعية للظرف تاني وكدة أنتي معاكي 30 ظرف قيمة مصروف يومي وهتحدديهم حسب مرتبك أو مصروف بيتك وكمان هتحسبي عدد أفراد أسرتك بالنسبة بئي لباقي مستلزمات البيت برضه هنحطها في الاظرف دي وهتعملي أظرف برضه لمصاريف ( النت - الكهربا - الغاز ) وكل واحد في ظرف مكتوب عليه خاص بأيه ولو مش حابه او مش لاقية الاظرف ممكن تستخدمي علب الصابون حتي بس الاظرف متوافرة في جميع المكتبات والاظرف كلها لازم تشليهم في علبه كلهم مع بعض علشان مفيش ظرف يضيع كدة والا كدة وكمان بالنسبة للأظرف كمان انتي كل شهر بتصرفي منها وتخليها للشهر اللي بعده يعني الأظرف ممكن تقعد معاكي سنين مش كل شهر هتشتري أظرف جديدة وبكدة نكون أتكلمنا عن التوفير والتدبير وتنظيم مصروف البيت ..

ملحوظة : الفلوس اللي هتزيد معاكي من اليوم هتجمعيها وممكن تشتري بيها حاجات نقصاكي مثلا تجددي حاجه في بيتك مثلا وكمان ممكن تحوشي عليها وتشتري لنفسك خاتم والا غويشة او حته حلق دهب ويارب تكونو أستفدتو بهذا المقال وأكون قدرت أوصلكم المعلومة .